Des isch Weihnachda!

A Gedicht von dr Ingrid Geiger

Durch d`Stadt hetza
und in letschder Minut
G`schenkla kaufa für Leut,
dia sowieso scho alles hend:
Des isch net Weihnachda!

"Oh du fröhliche" aus em Lautsprecher,
Girlanda en dr Fußgängerzone,
Nikläus an alle Ecka,
lebendige ond solche aus Schoklad:
Des isch net Weihnachda!

Werbeg`schenkla verdoila,
auf`s Weihnachtsgeld warda,
noch Teneriffa fliaga
ond "Oh Tannenbaum" unter Palma senga:
Des isch net Weihnachda!

Aber wenn`s em ganza Haus schmeckt,
noch Zimt ond Bredla ond ausblosene Kerza,
ond wenn d`Kender Weihnachtsliader spielet,
au wenn`s a bissle falsch klengt:
Des isch Weihnachda!

Wenn en dr Kirch "Stille Nacht" g`sunga wird,
daß dr ganz feierlich z`muat wird,
ond wenn de erschde Schneeflocka fallet,
grad wenn de aus dr Kirch kommsch:
Des isch Weihnachda!

Wenn du woisch,
daß dir`s guat goht ond deiner Familie au,
ond wenn da noch ded andre net vergisch,
dias net so guat hend wia du:
Des isch Weihnachda!